XƏBƏRLƏR

64. “Şəkərli diabet üzrə Dövlət Proqramı”nın təsdiq edilməsi haqqında Azərbaycan Respublikası Nazirlər Kabinetinin Qərarı, 2005-ci il

                 “Şəkərli diabet üzrə Dövlət Proqramı”nın təsdiq edilməsi haqqında

AZƏRBAYCAN RESPUBLİKASI NAZİRLƏR KABİNETİNİN QƏRARI

 

“Şəkərli diabet xəstəliyinə tutulmuş şəxslərə dövlət qayğısı haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2004-cü il 12 fevral tarixli 32 nömrəli Fərmanına uyğun olaraq Azərbaycan Respublikasının Nazirlər Kabineti qərara alır:

1. “Şəkərli diabet üzrə Dövlət Proqramı” təsdiq edilsin (əlavə olunur).
2. Azərbaycan Respublikasının Səhiyyə Nazirliyi və digər aidiyyəti təşkilatlar Dövlət Proqramının həyata keçirilməsini təmin etsinlər.
3. Bu qərar imzalandığı gündən qüvvəyə minir.

 

Azərbaycan Respublikasının Baş naziri    A.RASİZADƏ

 

Bakı şəhəri, 7 iyun 2005-ci il

№ 101

 

Azərbaycan Respublikası Nazirlər Kabinetinin

2005-ci il 7 iyun tarixli 101 nömrəli qərarı ilə

TƏSDİQ EDİLMİŞDİR

 

Şəkərli diabet üzrə

DÖVLƏT PROQRAMI

GİRİŞ

Dünya praktikasında xroniki qeyri-infeksion xəstəliklərin biotibbi, psixoloji və sosial-iqtisadi aspektlərinə kompleks yanaşılması prosesində şəkərli diabet (ŞD) bir model kimi götürülmüşdür. Şəkərli diabetin geniş miqyasda artımı əhalinin sağlamlığının ümumi səviyyəsini azaldır. Məhz buna görə Dünya Səhiyyə Təşkilatı (DST) 1992-ci ildə şəkərli diabet xəstəliyini qeyri-infeksion epidemiya kimi qiymətləndirmişdir. DST-nin məlumatına görə, 1985-ci ildə dünyada 30 milyon şəkərli diabetlə xəstə insan olduğu halda, bu gün həmin rəqəm təxminən 6,5 dəfə artaraq 194 milyona çatmışdır. Hesablamalara görə, 25 ildən sonra şəkərli diabet xəstələrinin sayının 330 milyona yaxın olacağı gözlənilir. Azərbaycanda 2004-cü il üçün 54554 nəfər şəkərli diabetlə xəstə qeydiyyata alınmışdır, o cümlədən 344 uşaq, 198 yeniyetmə. Onlardan 17062 nəfəri insulindən asılı, 37492-si isə insulindən asılı olmayan şəkərli diabetlə xəstədir.

Dünyanın bir çox ölkələrində diabet ölüm səbəbinə görə ürək, qan-damar çatışmazlığından və onkoloji xəstəliklərdən sonra üçüncü yeri tutur. DST-nın məlumatına görə, əhalinin ümumi populyasiyası ilə müqayisədə şəkərli diabetlə xəstə olanlar arasında ürək, qan-damar çatışmazlığından ölüm halları 4-5 dəfə, korluq halları 10 dəfə, qanqren və aşağı ətrafların amputasiyası 50 dəfə, xroniki böyrək çatışmazlığı 5-6 dəfə çoxdur. Diabetin xroniki, ağır fəsadlarına qoyulan maddi vəsait (məsələn, hemodializ) onun profilaktikasına sərf edilən məbləğdən qat-qat çoxdur. Artıq sivil ölkələrdə bunu elmi-iqtisadi baxımdan sübut etdikləri üçün ŞD-nin müalicə və profilaktikasına xüsusi yer verilir.

Hazırda respublikada Bakı, Şəki, Mingəçevir və Naxçıvan endokrinoloji dispanserləri, Gəncə şəhərində poliklinika şöbəsi olan endokrinoloji xəstəxana, həmçinin Bakı şəhərində Respublika Endokrinoloji Mərkəzi fəaliyyət göstərir. Qeyd edilən müəssisələrlə yanaşı, ŞD ilə xəstə olanlara ambulator və stasionar yardım poliklinikaları, tibbi-sanitariya hissələri, mərkəzi rayon xəstəxanalarının endokrinoloji kabinetləri və şöbələri tərəfindən də göstərilir. Şəkərli diabet xəstələri üçün ixtisaslaşdırılmış çarpayıların ümumi sayı 540-dır (onların 55-i uşaq endokrin şöbəsinə məxsusdur). Bakı, Sumqayıt, Şəki və Mingəçevir şəhərlərində endokrinoloji xidməti olan tibb müəssisələrində xəstələr üçün ictimai əsaslarla özünənəzarət təlim məktəbləri fəaliyyət göstərir.

“Şəkərli diabet xəstəliyinə tutulmuş şəxslərə dövlət qayğısı haqqında” Azərbaycan Respublikasının Qanununun tətbiq edilməsi barədə” Azərbaycan Respublikası Prezidentinin 2004-cü il 12 fevral tarixli 32 nömrəli Fərmanına əsasən hazırlanmış “Şəkərli Diabet üzrə Dövlət Proqramı” diabet xəstələri üçün tibbi yardımın iqtisadi cəhətdən əsaslandırılmış modelinin yaradılmasına, onların həyat fəaliyyətinin yüksəldilməsinə, ömürlərinin uzadılmasına, müalicə keyfiyyətinin yaxşılaşdırılmasına yönəldilmişdir. Proqram 2 mərhələdən ibarət olmaqla, 2005-2009-cu illəri əhatə edir. Birinci mərhələ - 2005-2007-ci illər - təcili tədbirlərin hazırlanması və həyata keçirilməsi, ikinci mərhələ - 2007-2009-cu illər - tədbirlərin həyata keçirilməsi və Proqramın yerinə yetirilməsinin yekun nəticələri kimi nəzərdə tutulur.

Proqramın həyata keçirilməsinə kütləvi informasiya vasitələri, yerli və xarici diabetoloji təşkilatlar, ictimai birliklər, ictimaiyyət cəlb edilə bilər.

 

DÖVLƏT PROQRAMININ MƏQSƏD VƏ VƏZİFƏLƏRİ

 

Şəkərli diabet xəstəliyinə tutulmuş şəxslərin həyat fəaliyyətlərinin yüksəldilməsi və uzadılması;

şəkərli diabetin fəsadlarından əmələ gələn əlilliyin, sağlamlıq imkanları məhdudluğunun və ölüm hallarının azaldılması;[1]

şəkərli diabet və onun fəsadlarının profilaktika sisteminin təşkili;

şəkərli diabet xəstəliyinə tutulmuş şəxslərə göstərilən illik tibbi yardımın (o cümlədən zəruri olan müayinələrin) həcminin, inyeksiya vasitələrinin, insulin və digər şəkərsalıcı dərman preparatlarının, özünənəzarət vasitələrinin siyahısının və miqdarının, habelə bu preparat və vasitələrlə təminat qaydasının müəyyən edilməsi;

şəkərli diabet xəstəliyinə tutulmuş şəxslərin registrinin və indiki zamanda xəstəliyin vəziyyəti barədə zəruri məlumat bankının yaradılması;

şəkərli diabet xəstəliyinə tutulmuş şəxslərin dövlət tibb müəssisələrində müayinəsinin və müalicəsinin maliyyələşdirilməsi qaydasının müəyyən edilməsi;

şəkərli diabet xəstəliyinin müalicəsi üzrə tibb mütəxəssislərinin hazırlanması, ixtisaslarının artırılması və diabetoloji xidmətin strukturunun yaradılması;

şəkərli diabet xəstəliyinə tutulmuş uşaq və gənclərin qeydiyyatı aparılmaqla, onlara təhsil aldıqları müəssisələrdə tibb mütəxəssisləri və müəllimlər vasitəsilə xüsusi nəzarətin təşkil edilməsi, səhhətlərində hər hansı dəyişiklik baş verdikdə təcili tibbi yardımın göstərilməsi;

şəkərli diabet xəstəliyinə tutulmuş şəxslərin sanator-kurort müəssisələrində müalicəsinin təşkili, eləcə də dərman vasitələrinə və diabetik ərzaq məhsullarına olan tələbatının təmin edilməsi.

 

 

 

DÖVLƏT PROQRAMININ MALİYYƏLƏŞDİRİLMƏSİ (MİNİMAL RƏQƏMLƏR)

 

İllər	Maliyyələşdirmə üçün vəsaitlər (mlrd, manat)
	İnsulin preparatları ilə təminat	Həbşəkilli şəkərsalıcı preparatlarla təminat	İnsulin inyeksiyası üçün lazım olan ləvazimatlarla təminat	Özünənəzarət vəsaitlərinin maliyyələşdirilməsinin təmin olunması	Cəmi
2005 *	20	15	0,5	10	45,5

 

 

Proqramın maliyyə mənbələri - dövlət büdcəsi, məcburi tibbi sığorta ödəmələri, hüquqi və fiziki şəxslərin ianələri, eləcə də qanunvericiliklə qadağan olunmayan digər vəsaitlər.

 

DÖVLƏT PROQRAMININ HƏYATA KEÇİRİLMƏSİNDƏN GÖZLƏNİLƏN NƏTİCƏLƏR

 

Şəkərli diabetlə xəstə olan insanlar üçün diabetoloji xidmətin təkmilləşdirilməsi;

dövlət registrinin, həmçinin məlumat bankının yaradılması və fəaliyyət mexanizminin hazırlanması;

Azərbaycanın şəhər və rayonlarında və Bakı şəhərinin rayonlarında təlim məktəblərinin yaradılması və onların fəaliyyətinin uyğun olaraq Respublika Endokrinoloji Mərkəzi (REM) və Bakı Şəhər Endokrinoloji Dispanseri (BŞED) tərəfindən mərkəzləşdirilmiş şəkildə idarə edilməsi;

Səhiyyə Nazirliyi və Təhsil Nazirliyinin birgə əməkdaşlığı sayəsində ümumtəhsil müəssisələrində təhsil alan şəkərli diabetlə xəstə olan şəxslər üçün xüsusi qayğının təşkili vasitəsilə ağır və kəskin halların qarşısının alınması;

şəkərli diabetlə xəstə olan insanların dərman preparatları, özünənəzarət vasitələri və digər ləvazimatla tam təminatı;

əhali və şəkərli diabetlə xəstə insanlar arasında profilaktika işlərinin aparılması;

diabetin müalicəsində tətbiq olunan ən müasir preparatların və müayinə metodlarının Azərbaycanda tətbiqi üçün ekspertlər qrupunun təşkil edilməsi;

şəkərli diabetlə xəstə olan insanların sanator-kurort müalicəsinin təşkili;

pəhriz məhsullarının hazırlanmasında yerli istehsalın inkişafı;

şəkərli diabet xəstəliyinin xroniki fəsadlarının və bu xəstəlikdən ölüm hallarının azaldılması.

 

Dövlət Proqramı çərçivəsində həyata keçirilməsi nəzərdə tutulan

TƏDBİRLƏR  [2]

 

Sıra №-si		Tədbirlərin adı			İcraçılar			İcra müddəti (illər üzrə)
1		2			3			4
I. ŞƏKƏRLİ DİABETLƏ XƏSTƏ OLAN ŞƏXSLƏR ÜÇÜN DİABETOLOJİ XİDMƏTİN TƏŞKİLİ
1.		Dövlət Registrinin, həmçinin məlumat bankının yaradılması və fəaliyyət mexanizminin hazırlanması			Səhiyyə Nazirliyi, Dövlət Statistika Komitəsi			2005-2007
1.1. Endokrinoloji mərkəzlərdə və endokrinoloji xidməti olan tibb müəssisələrində diabetoloji xidmət strukturunun təkmilləşdirilməsi
2.		Respublika Endokrinoloji Mərkəzinin fəaliyyətinin genişləndirilməsi			Səhiyyə Nazirliyi			2005-2007
3.		Kadrların təkmilləşdirilməsi və hazırlanması			Səhiyyə Nazirliyi			2005-2007
4.		Əhalinin sayına görə endokrinoloq, pediatr-endokrinoloq, təlimçi heyət (1 nəfər diabetoloq-həkim, 1 nəfər dietoloq, 1 nəfər tibb bacısı) ştatının təmin edilməsi			Səhiyyə Nazirliyi			2005-2007
5.		Endokrinoloq və təlimçi heyətin fəaliyyətinin yaxşılaşdırılması məqsədilə maddi-texniki bazanın yaradılması			Səhiyyə Nazirliyi			2005-2007
6.		Xəstələrin müayinə, müalicə və təliminin beynəlxalq standartlara uyğun aparılması üçün metodik vəsaitlərin hazırlanması və treninqlərin keçirilməsi			Səhiyyə Nazirliyi			2005-2007
1.2. Diabetoloji xidmətin tərkib hissəsi olan “şəkərli diabetlə xəstə olan şəxslərin özünənəzarət” təlim məktəblərinin yaradılması
7.		Azərbaycanın bölgələrində və Bakı şəhərinin rayonlarında endokrinoloji yardım göstərən tibb müəssisələrində təlim məktəblərinin yaradılması və onların fəaliyyətinin uyğun olaraq REM və ŞED tərəfindən mərkəzləşdirilmiş şəkildə idarə edilməsi			Səhiyyə Nazirliyi			2005-2007
8.		Respublikanın ambulator-poliklinika müəssisələrində qeydiyyatda olan şəkərli diabetlə xəstələrin sayına uyğun olaraq diabet məktəblərinin təşkili			Səhiyyə Nazirliyi			2005-2007
9.		Respublikada ekdokrinoloji çarpayıları olan stasionarlarda diabet məktəbinin təşkili			Səhiyyə Nazirliyi			2005-2007
10.		Respublikada təşkil edilmiş diabet məktəblərinin yeni metodik vəsaitlərlə, normativ sənədlərlə təmin edilməsi, təlimçi heyətlərin hazırlanması, seminar və treninqlərin keçirilməsi			Səhiyyə Nazirliyi			2005-2007
	11.			Respublikada mövcud olan təlim məktəblərinin fəaliyyətinin gücləndirilməsi, maddi-texniki imkanlarının artırılması			Səhiyyə Nazirliyi			2005-2007
	12.			Respublikada mövcud olan təlim məktəblərinin fəaliyyəti haqqında statistik göstəricilərin, analitik informasiyaların, elmi tədqiqat işlərinin vaxtaşırı Səhiyyə Nazirliyinə təqdim edilməsi			Səhiyyə Nazirliyi			2005-2007
	13.			Şəkərli diabet xəstəliyi olan şəxslərin dövlət tibb müəssisələrində müayinəsinin və müalicəsinin maliyyələşdirilməsinin təmin edilməsi			Səhiyyə Nazirliyi, Maliyyə Nazirliyi			2005-2007
	1.3.         Şəkərli diabet xəstəliyinin müalicəsi üzrə tibb mütəxəssislərinin, təlimçilərin hazırlanması
	14.		Ə. Əliyev adına Azərbaycan Dövlət Həkimləri Təkmilləşdirmə İnstitutu nəzdində endokrinologiya üzrə kursun fəaliyyətinin gücləndirilməsi				Səhiyyə Nazirliyi			mütəmadi
	15.		Kadrların təkmilləşdirilməsi və hazırlanması				Səhiyyə Nazirliyi			mütəmadi
	16.		Həkim-endokrinoloqlar üçün müasir diabetologiya üzrə 1 aylıq təkmilləşmə kursu proqramının hazırlanması				Səhiyyə Nazirliyi			mütəmadi
	17.		Endokrinoloq-tibb bacıları üçün müasir diabetologiya sahəsi üzrə 1 aylıq təkmilləşmə kursu proqramının hazırlanması				Səhiyyə Nazirliyi			mütəmadi
	18.		Bütün həkim-endokrinoloqların 1 aylıq diabetologiya üzrə təkmilləşmə kurslarından keçməsi				Səhiyyə Nazirliyi			mütəmadi
	19.		Endokrinoloji xidmətdə fəaliyyət göstərən bütün tibb bacılarının 1 aylıq diabetologiya üzrə təkmilləşmə kurslarından keçməsi (kursların qrafiki Səhiyyə Nazirliyinin kadrlar, elm və təhsil şöbəsi tərəfindən hazırlanır)				Səhiyyə Nazirliyi			mütəmadi
	20.		Elmi konfranslar, elmi-praktik seminarların keçirilməsi				Səhiyyə Nazirliyi			mütəmadi
	21.		Digər ixtisas həkimləri üçün diabetologiya üzrə həftəlik treninqlər proqramının hazırlanması və keçirilməsi				Səhiyyə Nazirliyi			mütəmadi
	22.		Ümumtəhsil müəssisələrində təhsil alan şəkərli diabetlə xəstə olan şəxslər üçün xüsusi nəzarətin təşkili				Səhiyyə Nazirliyi Təhsil Nazirliyi			2005-2009
	23.		Ümumtəhsil müəssisələrində tibb işçiləri və müəllimlərlə seminar məşğələlərinin keçirilməsi, onların praktik və metodik vəsaitlərlə təmin edilməsi				Səhiyyə Nazirliyi Təhsil Nazirliyi			2005-2009
	II.     ŞƏKƏRLİ DİABETLƏ XƏSTƏ OLAN ŞƏXSLƏRİN ƏN VACİB DƏRMAN PREPARATLARI, ÖZÜNƏNƏZARƏT VASİTƏLƏRİ VƏ DİGƏR VACİB LƏVAZİMATLARLA TƏMİNATI
	24.		İllik tibbi yardımın həcminin, inyeksiya vasitələrinin, insulin və digər şəkərsalıcı dərman preparatlarının, özünənəzarət vasitələrinin miqdarının müəyyənləşdirilməsi				Səhiyyə Nazirliyi			2005
	25.		Müəyyən edilmiş illik tələbatın şəkərli diabetlə xəstə olan şəxslərə çatdırılma mexanizminin hazırlanması				Səhiyyə Nazirliyi, Maliyyə Nazirliyi			2005-2009
	26.		Tibb müəssisələrində qeydiyyatda olan şəkərli diabetlə xəstə insanların fərdi olaraq tələbatının həcminin 6 aydan bir şəhər və rayon səhiyyə orqanları tərəfindən Səhiyyə Nazirliyinə təqdim edilməsi				Səhiyyə Nazirliyi, Maliyyə Nazirliyi			2005-2009
	III. ŞƏKƏRLİ DİABETİN VƏ ONUN AĞIRLAŞMALARININ PROFİLAKTİKASI
	27.		Sağlam əhali arasında şəkərli diabet xəstəliyinin profilaktikası				Səhiyyə Nazirliyi			2005-2009
	28.		Şəkərli diabetlə xəstə olan şəxslər arasında diabetin xroniki fəsadlarının profilaktikası				Səhiyyə Nazirliyi			2005-2009
	29.		Əhali arasında şəkərli diabet xəstəliyinin erkən aşkar edilməsi məqsədilə daimi və geniş şəkildə qlükozaya tolerantlıq testinin, həmçinin acqarına qanda qlükozanın müəyyən edilməsini təmin etmək üçün təlimatların hazırlanması				Səhiyyə Nazirliyi			2005-2009
	30.		Ərazi poliklinikalarında risk qrupuna aid şəxslərin qeydiyyata götürülməsi və nəzarətdə saxlanılması				Səhiyyə Nazirliyi			2005-2009
	31.		Kütləvi informasiya vasitələrindən istifadə edərək əhali arasında şəkərli diabet xəstəliyinin profilaktikasının təbliğinin təşkil edilməsi				Səhiyyə Nazirliyi			2005-2009
	32.		Nefropatiyanın və gələcəkdə hemodializə ehtiyacın qarşısını almaq məqsədilə profilaktika işlərinin gücləndirilməsi. Bunun üçün erkən nefropatiyanı aşkarlaya biləcək yüksək keyfiyyətli biokimyəvi diaqnostikadan geniş istifadənin təmin edilməsi. Bütün xəstələrdə ildə 2 dəfədən az olmayaraq mikroalbumunuriyanın müayinəsinin aparılması				Səhiyyə Nazirliyi			2005-2009
	33.		Damar fəsadlarının inkişafının qarşısını alan profilaktik tədbirlərin tətbiq edilməsi. Bunun üçün ixtisaslaşdırılmış şöbələrdə (cərrahiyyə, kardioloji, göz, qan-damar) erkən damar fəsadlarını aşkarlaya biləcək kabinetlərin təşkil edilməsi				Səhiyyə Nazirliyi			2005-2009
	34.		“Diabetik pəncə” və “Hamiləlik diabeti” kimi xüsusi kabinetlərin açılması				Səhiyyə Nazirliyi			2005-2009
	35.		Ağır göz fəsadlarının qarşısını almaq üçün ildə 2 dəfə bütün qeydiyyatda olan şəkərli diabetlə xəstə şəxslərin göz dibinin müayinəsinin aparılması				Səhiyyə Nazirliyi			mütəmadi
	36.		Müxtəlif profilaktika sistemlərinin hazırlanması, yeniləşdirilməsi və təbliğinin təlim məktəbləri tərəfindən həyata keçirilməsi				Səhiyyə Nazirliyi			mütəmadi
	37.		Gənclər arasında şəkərli diabet xəstəliyinin profilaktikası məqsədilə maarifləndirmə işinin təşkili, müxtəlif çap məhsullarının hazırlanması, “dəyirmi masa”ların, konfransların, telemarafonların, mədəni-kütləvi tədbirlərin keçirilməsi və bu tədbirlərdə gənclərin, qeyri-hökumət təşkilatlarının iştirakının təmin edilməsi				Səhiyyə Nazirliyi, Gənclər və İdman Nazirliyi			mütəmadi
	IV. ŞƏKƏRLİ DİABETLƏ XƏSTƏ OLAN ŞƏXSLƏRƏ SANATOR-REABİLİTASİYA YARDIMININ TƏŞKİL EDİLMƏSİ
	38.		Şəkərli diabetlə xəstə olan şəxslərə sanator reabilitasiya yardımını tətbiq etmək üçün respublikanın sanator-kurort müəssisələrində diabet xəstələrinin sayma uyğun çarpayıların ayrılması				Azərbaycan Həm-karlar İttifaqları Konfederasiyası, Əmək və Əhalinin Sosial Müdafiəsi Nazirliyi, Səhiyyə Nazirliyi		2005-2009
	39.		Uşaq və gənclərin yay istirahətini təmin etmək üçün düşərgələrin təşkili, onların tibb işçiləri və tibbi ləvazimatla təmin edilməsi				Mədəniyyət və Turizm Nazirliyi Nazirliyi, Səhiyyə Nazirliyi		2005-2009
	V. ŞƏKƏRLİ DİABET XƏSTƏLİYİNİN MÜAYİNƏ, MÜALİCƏ VƏ PROFİLAKTİKASINDA ELMİ TƏDQİQAT İŞLƏRİNİN GÜCLƏNDİRİLMƏSİ
	40.		Respublika Endokrinoloji Mərkəzinin tərkibində diabetologiya üzrə elmi tədqiqat işlərinin aparılması				Səhiyyə Nazirliyi		2005-2009
	41.		Yeni yüksək ixtisaslı kadrların hazırlanması				Səhiyyə Nazirliyi		2005-2009
	42.		Diabetologiya üzrə yeni metodik vəsaitlərin, elmi və elmi-kütləvi ədəbiyyatın hazırlanması				Səhiyyə Nazirliyi		2005-2009
	VI. ŞƏKƏRLİ DİABET XƏSTƏLİYİNƏ TUTULMUŞ ŞƏXSLƏRİN DƏRMAN VASİTƏLƏRİNƏ VƏ DİABETİK ƏRZAQ MƏHSULLARINA OLAN TƏLƏBATININ TƏMİN EDİLMƏSİ
	43.		Şəkərli diabetlə xəstə olan insanlar üçün pəhriz mağazalarının və qida məhsullarının yerli istehsalının təşkili			Yerli icra hakimiyyəti orqanları, Səhiyyə Nazirliyi			2005-2009

 

 

 

 

 

 

 

 

 

 

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

1. 2 may 2006-cı il tarixli 119 nömrəli Qərarı (Azərbaycan Respublikasının Qanunvericilik Toplusu, 2006-cı il, № 5, maddə 463)
2. 22 fevral 2008-ci il tarixli 50 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2008-ci il, № 2, maddə 130)

 

 

 QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI

 

---

* Şəkərli diabetlə xəstə şəxslərin sayının hər il 15% artacağı nəzərə alınaraq, növbəti illər üçün vəsait əvvəlki ildə ayrılan vəsaitin 15% artımı nəzərə alınmaqla hesablanmalıdır.

---

[1] 22 fevral 2008-ci il tarixli 50 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2008-ci il, № 2, maddə 130) ilə «Şəkərli diabet üzrə Dövlət Proqramı»nın «Dövlət Proqramının məqsəd və vəzifələ ri» bölməsinin ikinci abzasında «əlilliyin» sözü «əlilliyin, sağlamlıq imkanları məhdudluğunun» sözləri ilə əvəz edilmişdir.

 

[2] 2 may 2006-cı il tarixli 119 nömrəli Qərarı (Azərbaycan Respublikasının Qanunvericilik Toplusu, 2006-cı il, № 5, maddə 463) ilə Azərbaycan Respublikası Nazirlər Kabinetinin 2005-ci il 7 iyun tarixli 101 nömrəli qərarı ilə təsdiq edilmiş “Şəkərli diabet üzrə Dövlət Proqramı” nın Dövlət Proqramı çərçivəsində həyata keçirilməsi nəzərdə tutulan Tədbirlər” in 37-ci bəndində “Gənclər, İdman və Turizm” sözləri “Gənclər və İdman” sözləri ilə və 39-cu bəndində “Gənclər, İdman və Turizm Nazirliyi” sözləri “Gənclər və İdman Nazirliyi”, “Mədəniyyət və Turizm Nazirliyi” sözləri ilə əvəz edilmişdir.

 

 

  

 

Bu xəbər 4424 dəfə oxunub

Oxşar xəbərlər:

• - Azərbaycan Nazirlər Kabineti "Tibbi-sosial ekspertiza müayinəsinə göndərişlərin verilməsi Qaydaları”nı təsdiq edib.
• - 71. Azərbaycan Respublikasında insanın immunçatışmazlığı xəstəliyinin (AİDS)* yayılmasının qarşısının alınmasına dair “MİLLİ STRATEJİ PLAN”ın təsdiqlənməsinə dair Azərbaycan Respublikası Nazirlər Kabinetinin Sərəncamı, 2002-ci il
• - 70. “2011-2015-ci illər üçün yoluxucu xəstəliklərin immunoprofilaktikasına dair Tədbirlər Proqramı”nın təsdiq edilməsi haqqında Azərbaycan Respublikası Nazirlər Kabinetinin Qərarı, 2010-cu il
• - 69. "Ətrafdakıları vərəmlə yoluxdurmaq təhlükəsi olan şəxslərin işləməsi qadağan olunan peşə və vəzifələrin Siyahısı"nın təsdiq edilməsi haqqında Azərbaycan Respublikası Nazirlər Kabinetinin Qərarı, 2003-cü il
• - 68. "Daimi yaşayış yeri olmayan, ətrafdakılar üçün təhlükə törədən vərəm xəstəliyinə tutulmuş şəxslər üçün təşkil olunan xüsusi xəstəxana-internatlara xəstələrin göndərilməsi və qəbulu Qaydası"nın təsdiq edilməsi haqqında Azərbaycan Respublikası Nazirlər Kabinetinin Qərarı, 2003-cü il
• - 67. “2011-2015-ci illər üçün vərəmlə mübarizə üzrə Tədbirlər Proqramı”nın təsdiq edilməsi haqqında Azərbaycan Respublikası Nazirlər Kabinetinin Qərarı, 2010-cu il
• - 66. Transplantasiya obyekti olan orqan və (və ya) toxumaların Siyahısının təsdiq edilməsi haqqında Azərbaycan Respublikası Nazirlər Kabinetinin Qərarı, 2000-ci il
• - 65. Şəkərli diabet xəstəliyinə tutulmuş şəxslərə göstərilən illik tibbi yardımın (0 cümlədən zəruri olan müayinələrin) həcmi, inyeksiya vasitələrinin, insulin və digər şəkərsalıcı dərman preparatlarının, özünənəzarət vasitələrinin siyahısı və miqdarı"nın və "Şəkərli diabet xəstəliyinə tutulmuş şəxslərin insulin və digər şəkərsalıcı dərman preparatları, inyeksiya və özünənəzarət vasitələri ilə təminatı Qaydası"nın təsdiq edilməsi haqqında Azərbaycan Respublikası Nazirlər Kabinetinin Qərarı, 2005-ci il
• - 64. “Şəkərli diabet üzrə Dövlət Proqramı”nın təsdiq edilməsi haqqında Azərbaycan Respublikası Nazirlər Kabinetinin Qərarı, 2005-ci il
• - 63. “2011-2015-ci illər üçün şəkərli diabet üzrə Tədbirlər Proqramı”nın təsdiq edilməsi haqqında Azərbaycan Respublikası Nazirlər Kabinetinin Qərarı, 2010-cu il
• - 62. Psixi pozuntu nəticəsində şəxsin ayrı-ayrı peşə növlərində və yüksək təhlükə mənbəyi ilə bağlı işlərdə fəaliyyətin yerinə yetirilməsi üçün yararsız hesab edilməsinə əsas verən psixiatriya əks-göstərişlərin Siyahısının təsdiq edilməsi haqqında Azərbaycan Respublikası Nazirlər Kabinetinin Qərarı, 2003-cü il